BEFORE THE NEXT TEARDROP FALLS by Hriata Hrahsel

Ka hmangaihin min kalsan atanga kar khatna chiah a ni a, khawvel nawmna thlakhlelhna reng nei tawh lo leh mal ngawih ngawihin ka awm a, min hnemtu reng an awm mawlh lo. Ani kha theihnghilh ka duh lo asin, mahse ka hriatrengna hian min tina si, keimah leh keimah zawk hi intheihnghilh thei zawk ila ka va ti em.. Ni e, tu mihring tehlul in nge mahni hmangaihte’n fam dairial an chan san chuan tuar zo bik tehlul ang. Khawhar tak leh chhungril natna nasa tak tuar chungin chu zan hrehawm chu a ngai te bawkin ka hmang leh ta.. Beisei loh tak maiin ka phone chu a lo ri a, Hello, tu nge aw? tiin ka phone atanga min biak duh tu chu ka han chhawn a..
Tu nge a nih pawh sawi lem lo chuan “Thianpa ka na ngawih ngawih, min hmangaih emaw ka lo ti thin a, hetiang tur hi chuan kan tawp ka ring lo asin” tiin ka mi hriat ngai pawh ni lo chuan min rawn be ta mai a. “Thiannu min hai a ni lo maw? Kei chuan ka hmangaih chu ka then lo asin, mahse thihna rapthlak takin min then sak zawk asin ” tiin ka chhang a. Engtik laiin nge he thu ka sawi lai hian ka mittui a lo luan hman tih reng ka hre lo. “Nangman min then ka ti hleinem, I thianpa Benjamina zawk kha alawm ka tih”. a la rawn ti leh talh a, “Thiannu i biak tum pa chu ka ni lo a nih chu, thinpa Benjamina pawh ka nei hleinem” ka tih takah chuan a ngawi ta vang vang a. “A nih chuan ka tihpalh aw, ka lo hmet sual a nih dawn chu, ka tihpalh lutuk, ka dah mai aw, nang pawh lo dam vat rawh aw” tiin min rawn chhang ta reuh a. “Ngawi lawk teh, kei chuan khawvela hmu leh tawh miah lo turin ka hmangaih ber ka chan asin, nang chuan i la hmu fo dawn alawm, engtik hunah pawh rawn kir leh thei reng a ni, lungngai suh” tiin ka mi hriat ngailoh chu ka va hnem a, anin min hre lovin keiin hre bik ngai lo mah ila kan hmangaihte chan ve ve kan nih avang erawh chuan kan rilru a inpawh tawn nghal khawp mai. “Ka lawm e, mahse hmangaih mah ila a ni nen chuan kan rem leh tawh kher lovang” tih chauhvin min chhang ta a.. Chu chu a ni Sawmtluangi nena kan inhmelhriat tanna hmasa ber leh a hnu thlenga ka thiantha ber a lo nih takna chu.

Nitina inbe zuiin kan hmangaihte kan chan chhan inanglo mah se hmangaihte kan chan avanga thinlung hliam ve ve kan nihna avang erawh chuan kan inpawh hle mai. Kan han inhriat chian hnu phei chuan kan veng thenawm chiah ami a lo ni bawk nen kan inlen pawh tawn ta fo va. Kan lungngaihnaah te inhnem tawnin nitin zantin inbiak kan thulh lo va, a mipa zawk hi ka pachang lo lek lek zawk thin.. Kan inthianthatna kawng kan zawh tan tirh kha chuan a hmangaih em em chu a hnenah lo let leh chu ni se a hlim tur zia te a rawn sawi thin a, mahse ka natna avang khan keimah hi hnem ngai zawk ka ni leh nge nge thin. Mahse a ni erawh chu a puitlingin a damna tur aiin ka damna tur a ngaihtuah hram hram thin a, ka hmangaih ber ka ngaihtuah chhuah changa lungngai taka ka awm pawha min hnemtu ber a ni, ka va tluk lo tehlul em. Kum a liam a mahse kan inthianthatna erawh liam ahnekin a pung telh telh zawk si. Mahse ka hmangaih chu a ngai reng a, mual liam tawh hnu avang chuan ka thinlungah hian luahtu dang an leng thei tawh lo.

Ni khat chu zan lama ka men rei deuh avangin ka tho tlai deuh a, khawvela ka hmangaih berin mual min liamsan hnu atanga kum li na chiah a nih avanga mu thei lo ka nih vangin. Ka thawh veleh a ka hmuh thin Sawmtluangi hnen atanga ‘Good morning’ tih chu ka phone ah chuan ka hmu ta hauh lo mai, ka ngaih a tha lo nghal em em mai a, ka va biak lahin min chhang thei bawk si lo. Nilengin ka thian tha ber, ka tana hlu em em thawm riva hriat tur awm miah lo chu mak tihna leh hlauhthawnna in ka khat a, ka eng tih mah a tui thei tak tak lo. “Heti ang ngawt hi chu a dik dawn lo tlat ” tiin ka thiani hna thawhna lam chu pan ka tum ta a, ka bike ka herh rum dawn lai tak chuan ka phone message tone chu a rawn ri ta tlang tlang a, Sawmtluangi hnen atang chuan he thu te mai hi a lo thleng a, *H(min koh dan), vawiin nilengin ka lo be lo che a, ka tihpalh lutuk aw, hmun danga transfer turin min ti thut a ka buai deuh a, biak pawh ka lo be hman ta lo che anih kha, vawiin tlaiah tlai ni tla tur kan thlirna hmunah khan inhmu ang aw, thil pawimawh lutuk hrilh tur che ka nei* tih te mai chu. Ka bangbovin a ngaihna ka va hre lo em, ka thiantha ber leh min hnemtu, ka lungngaihna chhawk thei ber tu in min kalsan anga maw? A ni thei lo.

Ni dang ang bawka hun inher dan ngai reng si, chumi ni chuan hun a inher muang ka va ti tehlul em.. Rei tak ka nghah hnuah Sawmtluangi nena inhmu tura kan tiam hun chu a lo thleng a, chu hmun, tlai ni tla tur kan thlir dunna hmun ngei ah chuan huphurh rilru deuh bawk si, ka thiantha ber thusawi tur hre chak tawh bawk chung si chuan rilru mumallo tak chuan ka kal ta a. Ka va thlen chuan Sawmtluangi chu a lo awm reng tawh. Nidanga hlim taka inbe thin leh sawi tur ngah dun em emthin kha hemi tum zet hi chuan tawng hmasa zawk nih har kan ti dun ngei mai. “An sawn dawn che maw, I kalbo dawn tihna ami?” chu bak engmah sawi theih ka nei lo.
A ni pawh engmah sawi thei a ni bik lo, hrehawm a ti tih chu a hmelah a lang chhuak chiang kher mai. Rei tak kan ngawih dun vang vang hnuah zawi sap hian ‘ni lo hram se ka ti, mahse…’ a bak a sawi zui thei bik lo. A mit mawi tak atang chuan mittui arawn luang chhuak nghal a, dan tum mah se a dang zo bik lo. Kei pawh chuan sawi tur hrelo leh hamhaih taka ka awm vang nge, amah ka khawngaih a, ka ngaih em vang tih pawh ka hre hmanlo, ka kuah ta chawt mai a, a ni pawn nghet deuhin min kuah ve ta nghal a, mahse chawp leh chilhin tuma pawh then ni si lovin ka inthlah leh ta nghal a. Kan lai dun lutuk chu ka in nuih tet tet thei tawk a ni.. Rei fe kan ngawih dun leh hnu chuan a mipa zawk na na na chu ka tawng chhuak hmasa leh ta a, “Eng nge thil pawimawh deuh min hrilh tur i neih chu?” tiin ka zawt leh ta a.
“H, ka tan hian i hlu lutuk asin”..tiin bul a han tan a.
“Nangpawh ka tan chuan i hlu lutuk alawm, ka hlimna ber i ni asin” tiin ka chhang let ve ta a.

“Ih maw, Benjamina kha a lo let leh asin, mahse he thu hi sawi ka duh, ka tawn hma che kha chuan ka hmangaih ber a ni thin a, mahse nang ka tawn hnu che hi chuan thil engkim a danglam tawh”.. A ngawi leh vang vang a..

Ka rilruah ka hmangaih fam ta kha a rawn lang chhuak lo thei lo, Sawmtluangi hian min hmangaih thu a la sawi chhuak lo, mahse min lo hmangaih tawh reng a ni tih ka chiang ta.. Mahse vawiinah kher..a dik thei lo.

“Tluangte, vawiin hi Diki thih champha vawi li na a ni asin”
Chu bak engmah ka sawi zui thei bik lo.. “A ni maw, H, a thlanah va kal dun ang kei pawn ka kalbo hma hian tlawh ve ka duh asin” tiin min chhang ta a. Mahse a mit atanga mittui luang chu ka hmuh hmaih bik lo, keipawh ka bang bik chuang lo.

Diki thlanah chuan kan va kal a, mipa pawh ka insum zo ta bik lo, ka mit atangin mittui a luang zung zung mai a, Sawmtluangi pawh thiantha a nihna hlen takin min lo kuah bawk a.. Chumi hmunah chuan khaw thim thleng min awmpui ta a.

A tukah chuan Sawmtluangi chu ka va thlah ta a, ka thiantha ber, ka hlimna leh ka engkima engkim ni bawk chu mittui nena thlah ai chuan nui chunga thlah ka tum ta zawk a, mahse min kalsan tur chu tuar thiam a har ngei mai. A lan theih chhung zawng chuan hlim hmel pu chungin ka vei liam a, mahse thinlung lam erawh a ngui si.

Hemi hnu atang hi chuan Sawmtluangi nen kan inhlat ta telh telh a, min kalsan tak hnu phei kha chuan biak pawh kan inbe ngai mang tawh lo.. Ka khua a harin ka lung a leng em em a, Sawmtluangi ringawt rilru ah a lang ta, reh ahnekin nitin a zual zel mai si..Thla ruk zet a liam leh hnuah pawh ka thinlung hi chuan a hlat thei tak tak si lo. Chutah chuan a ni ka hmangaih a ni tih ka hriatchhuah tak ni.

Rilrua ka hmangaih che ti mawlh mawlh chung chuan Sawmtluangi chu va phone ka tum ta a, kan inhmuh tawp ber ni a ka ngainat thu hrilh ringawt pawh ka harsat tehreng nen tun tumah zet hi chuan ka hmangaih thu sawi tur hian ka za zek zek a ni ber mai. Phone chu a tlang ta, rang takin a ni pawn a lo la nghal a, mahse ka hmangaih thu hrilh nghal tawp ai chuan, i dam thin maw tiin bul ka tan leh hrih a. “Aw dam e, Misualpa, i va reh em em ve, i induh lutuk a ka pasal neih tur pawh i hre miah na nge?”.. Ka bing nghal mup mup a sawi tur pawh ka hre lo, rei fe ka ngawih vang vang hnuah “pasal i nei dawn a maw, tu nge?”.. Aw Benjamina kha mawle, karleh nilaini ah hian kan veng biakinah khan kan innei ang lo kal ve ngei ngei ang che, i lo kal loh nak chuan ka thinrim khawp ang” tiin min chhang a, a bak chu eng eng nge kan sawi pawh ka hre zui tawh lo..khua a tlai zo ta..

A kar leh nilaini chu a lo thleng ta a, Tluangtei pawh a nalh khawp mai, a pasal tur lah a hmeltha in he khawvela Tluangtei pasal tur awm ang maia mawi tlemte zinga pakhat a ni tih a lang chiang em em bawk si.. Tichuan Khuanu ruat lawk ang ngeiin inneihna chu tihfamkimin a lo awm ta.

Thla te ka lak pui zawh hnu chuan mahniin phurlo tak chung chuan *A bula i hlim a nih phawt chuan ka duhsakna sang ber ka hlan mawlh mawlh a che, i hlimna aia pawimawh he khawvelah hian a awm hleinem tiraw, mahse i thinlung hliama a lo awm nawn leh a, i mittui a tla nawn leh a nih chuan, a hnua tla nawn leh tur a awm tawh loh nan ka hruk hulsak tawh ngei ang che* tia rilrua sawi mawlh mawlh chungin chu biakin hungchhung chu ka chhuahsan ta a..

# He thawnthu hi Before the next tear drop falls tih hla Freddy Fender sak ka ngaihthlak atanga ka suangtuahna leng vel atanga ka rawn phuah chhuah ve liau liau a ni a, he thawnthua hming lang te hi ka phuahchawp vek a ni tih min lo hriat sak dawn nia.. Tin, thiam tawk lo chung chunga ka ziah a nih avangin hawrawp dik tawklo leh chhiar nuam lo lai deuhte pawh a lo awm maithei a, chhiartute ngaihdamna ka dil nghal bawk e.