"Ka mang a ang hle mai, Lalpa kutah tlulut phawt mai ila, a zangaihna chu a nasa hle si a; mihring kutah chuan mi tlukluh tir lul suh ang che". 2 Sam.24:14
Israel lal ropui Davida nunah hian zir tur tam tak a awm. A lalna leh a ropuina piah lamah hian a inchhung khur a harsatna a tawh zozai te leh amah ngei pawh thlemnaa a tluk thin thute hi zir tham a awm awm e.
A fapate an inthat a, a fapain a fanu a pawngsual a, a fapain sipai khawmin amah a do va, hmeichhiat mipatna sualah a tlu a, tual a that a, lungngaihna namen lovin a tlak buak thin.
A chunga kan Bible chang tarlan pawh khi Pathian thinurna a chunga a tlak avanga, duhthlan tur chuang awm hauhlo hremna pathum a hmachhawn laia Davida rilru puthmang leh thutlukna, duhthlanna a ni. Lalpa kutah a tlukluh miau avangin, tichhhe tur leh tihlum tura Vantirhkoh kut lek uaih tawh pawh chu Lalpa'n a khapsak leh ta a, "A tawk tawh e i kut lek tawh suh" a ti nem leh ta duai mai a nih chu.
Ni e, khawvel sual takah kan leng a, thlemnaten nitin min bei a, mun hneha sualah kan tlu sawp der mai thin a nih hi. Pathian ngaihdamna pawh beisei ngam lovin sual nen inpawmchilha Lalpa hlata awm law law a, kan mihring remhriatna hmanga a thianghlim leh thianghlimlo pawh sawilo va, eng hmanrua pawh hman mai kan duh thin a nih hi.
Mahse Lal ropui Davida chu chuti ang a ni velo. Pathian a hlat duh hauhlo va, a hnaih tlat a. A tul phawt chuan a lal puan aiah Saiip puan a inbel hrehlo. Lalpa a mamawh tih a inhre chianga, lu-a vaivut inphula chawngheiia thupha chawi a hreh velo. Eng dinhmunah pawh ding se Lalpa kuta tlukluh chu a thlang tlat thin a ni.
I nunah eng harsatna pawh lothlengin, Lalpa thinurna ngei pawh tuar mahla, LALPA chu i rinchhan leh duhthlan chu ni zel sela," Kei erawh chuan Lalpa lam ka en ang a, ka chuandamna Pathian chu ka nghak ang.... ...ka tluk hun chuan ka tho leh ang a; thima ka thut pawhin Lalpa chu ka tan eng a ni ang,"(Mika 7:7&8) ti tlat zel ang che.
Za Hluna Jahau
Comments